Заврши и денешното продолжение на протестите во рамките на Шарената револуција, во која мета на “чаталот“ беа фасадите на владата и на Собранието а се истури црвена боја и во фонтаната Воин на коњ.
Протестот, како и вообичаено започна со поддршка пред просториите на СЈО каде демонстрантите повторно побараа целосно укинување на аболицијата.
Оттаму тие се упатија кон Владата па преку Градскиот плоштад заврши пред Собрание. Пред демонстрантите денеска се обратија генералниот секретар на СДСМ и екс-министер за внатрешни работи, Оливер Спасовски и Јасмина Дуриќ, вработена во АРМ која неодамна доби прераспределба поради поддршката која ја дава за протестите.
Освен препознатливиот шарен пик-ап, денеска Шарената револуција беше засилена и со автомобил Застава кој беше обоен во неколку бои.
Забележливо беше и присуството на поранешната амбасорка на Холандија, Симоне Филипини, која во разговор со НОВА рече дека излегла за да им покаже на македонските граѓани дека се грижи.
Нејзината изјава за причините поради кои учествуваше во денешните протести проследете ја утре во блокот „Зошто протестирам“ кој го објавува НОВА.