Претседателот на Европскиот Совет, Шарл Мишел, утре доаѓа во посета на Република Северна Македонија. Мишел е во мини балканска турнеја и пред да ја посети земјава, тој беше во Босна и Херцеговина, Црна Гора и Косово.
Претседателот Мишел во „Вила Билјана“ во Охрид утре ќе се сретне со претседателот на државата, Стево Пендаровски, а како што информираа од кабинетот на претседателот, Пендаровски и Мишел ќе имаат тет-а-тет средба, по што ќе одржат заедничка прес-конференција.
Исто така, претседателот на Европскиот Совет, Мишел, ќе биде гостин на вториот Преспа форум за дијалог што од утре до 18 јуни ќе се одржи во Охрид, во организација на Владата на Северна Македонија.
Форумот ќе го отвори претседателот Стево Пендаровски, а на првата сесија на високо ниво, според најавите, ќе говорат и претседателите на Словенија, Борут Пахор, на Хрватска, Зоран Милановиќ, на Косово, Вјоса Османи – Кадриу и претседателот на Црна Гора, Мило Ѓукановиќ.