Египетскиот фоторепортер Махмуд Абу Заид, познат како Шавкан, е добитник на главната награда за слобода на медиумите на УНЕСКО за 2018 година.
Тој е во затвор од август 2013 година, откако бил уапсен додека известувал за демонстрациите на плоштадот Рабаа Ал-Адавија во Каиро. Во 2017 година, медиумите известуваа дека обвинителот барал смртна казна.
-Бев ставен во многу мала ќелија со други 39 затвореници. Во ќелијата беше многу жешко, немав место да седам и беше невозможно да дишам. Немаше вентилација. Не ми дадоа ништо за јадење и пиење првите три дена. Бев многу исплашен и мислев дека ќе умрам. Секој час доаѓаа и ме тепаа. Тоа беа најлошите денови од мојот живот. Ме боли и самата помисла на нив. Не добив никаков медицински третман за моите повреди, тука само тепање, раскажува Шавкан за организацијата за човекови права Аменсти Интернешенал.
Претседателката на житито Марија Реса изјави дека наградата, со која се оддава признание за унапредување на слободата на медиумите, како и „признание за неговата храброст, отпор и посветеност на слободата на изразување“.
Египетското Министерство за надворешни работи вчера го предупреди УНЕСКО поради таквата одлука, укажувајќи дека Шавкан се соочува со обвиненија поврзани со тероризмот.
Обединетите Нации оценија дека неговото апсење и притворање е произволно и спротивно на правата и слободите загарантирани со Универзалната декларација за човекови права и Меѓународниот пакт за граѓански и политички права.
Наградата ќе биде доделена на 2 мај, Денот на слободата на медиумите, кој годинава се прославува во Гана.
Наградата препознава лице, организација или институција кои имале исклучителен придонес за одбрана на слободата на изразувањето, особено при опасност. Таа се доделува во чест на Гиљермо Кано Исаза, колумбискиот новинар кој беше убиен пред канцелариите на неговиот весник „Ел експектадор“ во Богота, на 17 декември 1986 година.