Според пратеничката од редовите на СДСМ, Радмила Шеќеринска, граѓаните трпат ради несоодветното работење на пратениците во Собранието. Како што вели таа, се уште се плаќа непотребно, радиодиузна такса, и граѓаните нема да земат поголема просечна плата, бидејќи пратениците од ВМРО-ДПМНЕ се занимавале со лаги.
– Стравот и срамот се различни работи ама често имаат ист лик. Одговорно тврдам дека многу работи што ги кажувате од говорница се лага – но дојдовме до ова дереџе бидејќи зборуваме за вистината, која некого го боли. А таа оди вака – Пред 6 недели Груевски кажа „ДУИ ќе правеше коалиција со ВМРО-ДПМНЕ ама странците им направија притисок“. Сега вие или вашиот лидер лаже? Тој тврдеше дека ДУИ ќе се согласеше на коалицијата ама биле под притисок. Па тој кога лаже? Црнила им се закануваат на оние кои 10 години го рушеа животот во оваа држава, на оние кои немаа мерка, и сега им е страв и ве срамат вас, рече Шеќеринска, дополнувајќи дека одредени личности не сакале да одат во затвор па затоа им товарат срам на пратениците од ВМРО-ДПМНЕ да го опструираат Собранието.
На ова врати Крсте Мукоски од ВМРО-ДПМНЕ, кој Шеќеринска ја потсети дека нејзиниот сопартиец, Петре Шилегов претходно кажал дека политичките партии кои ќе прават коалиција, имаат програми кои потоа се спојуваат.
– Имате вие, имаат албанските партии. Двете програми се споиле. Цело време бараме да кажете дали во вашите споени програми, постои албанската платформа. Тоа бараме ние, тоа бараат луѓето надвор кои протестираат. Кажете јасно и гласно дали прифативте и што прифативте од албанската платформа. Дали е загрозен унитарниот карактер или не, рече Мукоски, алудирајќи на темите, кои три дена се предмет на реплики и контратеплики за ВМРО-ДПМНЕ во Собранието, а тоа се двојазичноста, кантонизација и федерализација.