Пратеничката од СДСМ Радмила Шеќеринска побара Собранието итно да гласа за измена на дневниот ред и пратениците да се изјаснат по предлогот за избор на претседател на Собранието затоа што има поддршка од 10 пратеници,повикувајќи се на одредби од Деловниот кои го овозможуваат тоа.
– Во текот на седницата по предлог на претседателот, на предлагачот или на пратеник кого го поддржуваат 10 пратеници, а еве ги 62, Собранието без претрес одлучува по секој предлог да се гласа за измени во редоследот на претресот. И тие сите додавки што сега си ги додавате ги нема во Деловникот, рече Шеќеринска.
Овој предлог, во текот на претходната дебата го изнесе пратеникот од СДСМ Оливер Спасовски кој побара поддршка од десет пратеници да се премине на точката за избор на претседател на Собранието.
Но на тоа претседавачот Трајко Вељаноски му одговори дека тој што им го дал овој совет, да бараат, како што рече „ вакви работи на сред расправа за друга точка очигледно не го знае Деловникот“.
Пратеникот од ВМРО-ДПМНЕ Илија Димовски одговорајќи на барањето на Спасовски рече дека претресот за оваа точка треба да трае додека не се исцрпи листата на пратеници пријавени за зборување и тоа што пратениците ќе поднеле предлог за избор на претседател на Собранието не ја исклучува можноста тоа да се направи и Комисијата за избори и именувања кога ќе биде избрана.