Убедена сум дека ова наше сојузништво и партнерство во кое покажавме дека се можни резултати на секој план, ќе продолжи како и денес. Да Ви посакам да ја носите оваа униформа со чест и со достоинство и како силно и секојдневно потсетување дека посветената работа секогаш носи резултат, нагласи министерката за одбрана Радмила Шекеринска на денешната промоција на новите униформи за припадниците на Армијата, во скопската касарна „Илинден“.
Здравствената криза што го зафати нашето целокупно општество, потенцираше Шекеринска, не ги намали инвестициите во одбраната и секојдневните заложби, и покрај вонредната состојба, за реализација на една од покрупните набавки што се презедоа заедно со оклопните возила.
„Заедно во такво партнерство и таков сојуз ја испишавме влезницата за НАТО, заедно го вративме достоинството во оваа професија. Навистина сум горда на овие заеднички достигнувања“, рече министерката Шекеринска.
Шекеринска наведе дека сме на крајот на долгата и исцрпувачка вонредна состојба што првпат беше прогласена на 18 март оваа година. Наведе дека Армијата заедно со здравствените работници, со полицијата одигра една од клучните улоги во овој тримесечен период.
„Бевте секаде каде ја бараа вашата поддршка. Како никогаш досега Армијата беше блиска и сплотена со својот народ затоа не ме изненадија истражувањата на јавно мислење кои покажаа дека Армијата е меѓу институциите во кои граѓаните имаат највисока доверба, а од државните институции на самиот врв. Доверба која ја примивме навистина за вашите дела ви честитам и ви благодарам“, рече министерката за одбрана пред присутните.
Според неа, последниот период од неколку месеци можеби е најсликовит пример зошто секогаш треба да вложуваме во Армијата.
„Верувам во партнерства и сојузи кои се потребни, прогресивни и принципелни, така влеговме во НАТО со работа со принципи со реформи и со резултати“, потенцира Шекеринска.