Елизабета Шелева, литературна критичарка и теоретичарка и професорка по книжевност при Филолошкиот Факултет на УКИМ поднесе оставка од жири комисијата за наградата „Браќа Миладиновци“ за 2016 година, што ја доделуваат Струшките вечери на поезијата, “поради тенденциозната одлука на мнозинството членови во комисијата, книгата „Црно на бело“ од Лидија Димковска да не биде вклучена во потесниот избор од пет дела”, се вели во писмената изјава на Шелева.
„Поетската збирка „Црно на бело“, со својата поетички доследна и концепциски радикална изведба, како и длабоките хумани вредности за кои пледира – е најсериозен фаворит за ова најпрестижно национално признание за поезија, а Лидија Димковска е реномирана и меѓународно потврдена авторка, која за своето творештво до сега има добиено пет важни и големи меѓународни признанија: германската награда за поезија „Хубер Бурда“, наградата на Европската унија за книжевност, романските награди за литература„Поесис“ и „Тудор Аргези“, како и европската награда за поезија „Петру Крду“- додека нејзините песни и прозни дела се преведени, застапени и објавени во врвни антологии и книжевни списанија, не само кај нас, туку и во светот.
Повеќе од 20 години наназад, Димковска со својата автентичност, оригиналност и бескомпромисност претставува репер за современата македонскаа литература, но и за меѓународната книжевна сцена, која несомнено го цени и вреднува името и делото на Лидија Димковска!
Со револт и индигнација се повлекувам од жири комисијата – одбивајќи да бидам соучесник во ваков етички и естетички преседан! Мојата долгогодишна дејност како книжевен критичар не ми дозволува да се огрешам или да отстапам од темелните вредносни и етички параметри / принципи, кои не запираат кај Табановце или Ѓуешево!
Врвните и ретки автори, каква што е и Лидија Димковска, не смеат да бидат „сирачиња – или посиноци – на татковината“ – без оглед на нивното актуелно место на живеење (адреса), а, уште помалку, на личните анимозитети и евентуалните идеолошки несогласувања со нив! Особено, кога станува збор за веќе осведочени и признаени граѓан(к)и на светот!“, вели Шелева.