Пратеникот од редовите на ДУИ Муса Ибраими за време на последната седница на Комисијата за финансирање и буџет одржана минатата недела, со потпис на списокот на пратеници потврдил присуство уште за двајца негови колеги кои не се појавиле на седницата, објави телевизија Шења.
Освен за него, пратеникот со различни пенкала на списокот на присутни пратеници ставил потпис и за неговите сопартијци Рамиз Мерко и Јамин Синани.
За сите пратеници кои живеат надвор од Скопје, Собранието ги плаќа патните трошоци, но за да добијат пари, пратениците прво треба да го потврдат присуството со потпишување на седница и фискални сметки од патарините.
Членовите на Собранието кои патуваат со автомобили со бензински горива, земаат надоместо од 18,3 денари по километар, или ако патуваат со возило со дизел гориво тогаш им следуваат 14,7 денари по километар.
Ако пратеникот Муса Ибрахим, патувал од општина Долнени Житоше за да учествува на седницата, според Google Maps, тој патувал околу 316 километри од живеалиштето до работа и назад. Ако ова се помножи со 14,7 денари по километар, тоа значи дека пратеникот за присуство на седницата ќе добие 4. 645 денари.
Јамин Синани, кој навел дека живее во гостиварското село Речан патува вкупно 149,4 километри, додека Рамиз Мерко кој патува од Струга за да присуствува на седницата добива надоместок за поминати 344 километри.
Додека течела седницата, пратениците Синан и Мерко воопшто не се појавиле иако колегата ги потпишал на списокот.
По објавување на прилогот на ТВ Шења, новинарот Мефаил Исмаили кој присуствувал на седницата добил навредливи СМС – пораки од пратеникот кој се потпишал во име на неговите колеги, кој меѓу другото навел дека е разочаран од прилогот на новинарот.
-Ако го гледате видеото, пратеникот кој порано беше наш колега новинар, а исто така сме пријатели повеќе години, влезе, се потпиша и по некое време се врати пак да се потпише во име на своите колеги. Ние тоа како настан го снимавме и нормално го пренесовме бидејќи се гледа злоупотреба на должноста, бидејќи се знае дека со потписот и фискалните сметки се добиваат пари за патни трошоци. Откако го објавив прилогот, пратеникот со 2 СМС пораки ми упати навредливи збороvи, но тие не би ги коментирал, нека му служат на чест, вели новинарот Исмаили.
НОВА се обиде да стапи во контакт со тројцата пратеници од ДУИ, но се до објавување на овој текст единствено успеавме да го добиеме на мобилен пратеникот Рамиз Мерко, кој кога слушна зошто го бараме го прекина повикот и не одговори понатаму на нашите повици. Неуспешни беа обидите да го добиеме и портпаролот на ДУИ – Бујар Османи.
Од Здружението на новинарите велат дека недозволиво е пратеник да се дрзне да пишува навредливи пораки кон новинар, кој објавил информација поткрепена со видео и факти.
-Наместо овој пратеник да се извини за ваквото однесување, тој се дрзнува да пишува пораки за новинари затоа што тој професионално се однесува и застанува зад заштитата на јавниот интерес. Ние испративме писмо до претседателот на Собранието, координаторот на пратеничката група на ДУИ и на претседателот на ДУИ каде силно го осудивме ваквиот притисок врз новинарите. Потенциравме дека таквата практика претставува цензура што е забрането со нашиот Устав и побаравме да преземат се што е во нивна моќ да го санкционираат пратеникот Ибраими со цел во иднина вакви инциденти да не ни се случуваат, вели претседателот на ЗНМ – Насер Селмани.