Претседателот на Српската радикална партија, Војислав Шешељ денеска ја повика српската влада под итно да формира научен институт кој би ги студирал судските практики на Хаг, а воедно порача дека Србија не смее да реагира пасивно на вчерашната одлука против воениот командант Ратко Младиќ, кој доби доживотен затвор за геноцид и злосторство врз човештвото.
„Србија мора да пружи квалитетен и стручен одговор на се што се случуваше во Хаг. Не се доволни само политички фрази. Лесно е да му упатуваме на Хаг политички аргументи но важно е тоа да биде поткрепено и со правни аргументи. Ни тоа не е тешко, само потребна е волја“, изјави Шешељ денеска.
Младиќ осуден на доживотен затвор, како течеше процесот до пресудата
Зборувајќи за пресудата на Младиќ, кој Хашкиот трибунал вчера го осуди на доживотен затвор за геноцид во Сребреница, радикалецот Шешељ смета дека се работи за противправна одлука и дека судиите не укажале на ниту една конкретна поврзаност помеѓу Младиќ и злосторството кое му се препишува.
Според него, сето тоа било смислено и испланирано и недостасувало адекватен одговор од Србија.
Шешељ смета дека не може да стане збор за геноцид бидејќи немало намера да се уништат сите муслимани и исто така, немало ниту еден геноцид во кој едната страна ја поштедила другата.
Тој смета дека Трибуналот сакал Младиќ да умре пред жалбената постапка во која одлуката на судиите би можела да биде поништена.