СДСМ денеска најави дека еден од приоритетите на новата влада ќе бидат темелни реформи во судството и обвинителството, за како што велат, обезбедување независен судски систем и правда за сите.
-Изборот на новата реформска Влада значи крај за „сваровски судството“. Новата власт значи крај за судии избрани од тевтерчиња кои ги штитат криминалите на Никола Груевски раководството на ВМРО-ДПМНЕ и носат нарачани судски пресуди против политички неистомисленици. Груевски и соработниците знаат дека промените носат и крај за балските интервенции кај државниот обвинител Марко Зврлевски, за кумските врски како онаа на Трајко Вељаноски и Јово Вангеловски, за кадровските пајажини во судството што ги прават Груевски и фамилијата и сега на заминување, како што се последните примери на смени во Кривичниот суд, рече портпаролот на партијата Петре Шилегов, на денешната прес конференција.
Тој најави дека веднаш по изборот на владата ќе предложат продолжување на мандатот на Специјалното јавно обвинителство, ќе се донесат измените на Законот за заштита на сведоци кои ги побара СЈО и ќе се обезбеди поширока поддршка и мнозинство за воведување на специјализирано одделение во судот, за постапување по предметите што се во надлежност на СЈО.
Шилегов најави и темелни реформи во Судскиот совет, измени на Законот на судови заради воведување јасни критериуми за избор, напредување и разрешување на судиите, како и темелни реформи во јавното обвинителство.
Тој во име на партијата ги повика сите вработени во јавните установи и правосудниот систем да бидат свесни за нивната одговорност и историскиот момент во кој живеат: да ја работат својата работа професионално, неселективно и според законите и да не се става во заштита на криминалот и криминалците.