Потпретседателот на СДСМ Петре Шилегов денеска најави дека партијата на претстојните локални избори ќе излезе со кандидати за градоначалници и советници – професионалци и признаени во своите професии, личности што се препознати од јавноста и кои се подготвени да работат во интерес на граѓаните.
-Корупцијата, расипништвото, деструкцијата и криминалното работење не се главна одлика на ВМРО-ДПМНЕ само на централно, туку и на локално ниво. Градоначалниците на ВМРО-ДПМНЕ доследно го следеле примерот на нивниот шеф Никола Груевски и истите, криминално работеа на штета на осиромашените граѓани, рече Шилегов на прес конференцијата.
Како примери ги наведе градоначалникот на Прилеп, Марјан Ристески кој, како што рече „ е осуден бидејќи работел на штета на Општината и граѓаните“, градоначалникот на Кавадарци Александар Панов кој е осуден што во кампањата „со црни пари купувал гласови“и градоначалникот на Битола, Владимир Талески е првообвинет во случајот „Транспортер“ на СЈО „за криминал тежок над 360.000 евра, граѓански пари“.
– Затоа, на локалните избори, градоначалниците на ВМРО-ДПМНЕ ќе се соочат со политичка, а оние кои што работеле незаконски и со правна одговорност, рече Шилегов.