Претседателот на Советот на општина Центар, Мирослав Шиповиќ, ја повлече својата оставка од функцијата.
Претставникот на советничката група од СДСМ, Ѓошо Вангелов, пред почетокот на седницата на Советот го повика Шиповиќ да ја повлече оставката и побара да најдат заеднички јазик со градоначалникот.
Шиповиќ побара 10 минутна пауза за размислување и го повика Жерновски на консултација. По неколкумиутната средба, претседателот на Советот ја повлече оставката, како и втората точка, на која требаше да се избере нов претседател на Советот.
Во изјава за медиумите, Шиповиќ рече дека одлуката за повлекување на двете точки кои се однесуваат на неговата оставка, ги донел по консултации со советничката група на СДСМ.
Градоначалникот на општина Центар, Андреј Жерновски, изјави дека очекувал на денешната седница да се избере нов претседател на Советот, а дека повлекувањето на оставката од страна на Шиповиќ е негов индивидуален чин. Познато е, посочи Жерновски, дека недоразбирањата се од пред 2 и пол години, кога ВМРО-ДПМНЕ го изгласа спорниот ДУП на Водно, кој овозможи изградба на десетокатница и улогата на Шиповиќ во носењето на овој ДУП.
Шиповиќ вчера за НОВА ТВ ги објасни причините зошто се повлекува од оваа позиција.
„Оставката ја поднесувам поради неможноста да остварам соработка со градоначалникот. Досега некако комунициравме, последните два месеца не комуницираме воопшто. Мислам дека е најдобро да се повлечам од функцијата и да дојде некој нов претседател на Советот, кој што можеби ќе оствари добра комуникација и соработка со градоначалникот“, вели Шиповиќ.