Шкендија му врачи отказ на Бруно Акраповиќ. Ваквата одлука на раководство на клубот доаѓа по двата пораза на домашен терен во фудбалскиот шампионат на Македонија. Тетовци во неделата загубија од Вардар со 0:2, а вчера и од Шкупи со 0:1 во поместената средба од третото коло што ја прели чашата кај управата на „црвено-црните“.
Според информациите од Тетово, веднаш бил свикан состанок на челниците на Шкендија и по детални анализи на двата натпревара бил заземен став за раскин на соработката со тренерот. „Нулите“ со Вардар и Шкупи се оценети како губење на сериозен замав во шампионатот што би можел да се одрази и врз позицијата на екипата на табелата. Како привремено решение на местото на Акраповиќ е назначен Јетон Беќири, досегашен асистент во стручниот штаб.
Шкендија под водство на Бруно Акраповиќ лани ја загуби трката за шампионската титула со Вардар. Клубот како утеха го освои Купот на Македонија, пехар што недостасуваше во витрините на тетовци, и имаше одлични настапи во квалификациите за Лигата на Европа во летниот период. „Црвено-црните“ стигна до плејофот, фаза во која беа елиминирани од белгиски Гент по елиминациите претходно на Краковија од Полска, на Нефчи од Азербејџан и на Млада Болеслав од Чешка.