Вардар го обелодени наследникот на Раул Гонзалес за наредните две натпреварувачки сезони. Изборот на управата на европскиот ракометен шампион падна на Роберто Гарсија Парондо (38) кој моментно работи со Ирина Дибирова во женската екипа на „црвено-црните“, но е дел од стручниот штаб и во репрезентацијата на Македонија. Минатата година имаше придонес и во подготовките на репрезентација до 21 година која го освои шестото место на младинското Светско првенство во Алжир.
„Среќен сум за укажаната шанса. Се надевам дека ќе возвратам со резултати како единствен начин за оправдување на довербата. Предизвикот е голем, особено што станува збор за клуб со голема традиција и постигнувања зад себе. Речиси цела сезона сум во Вардар и го чувствувам како свој дом, а условите што ги имаме ми дава за право да верувам во успешна соработка. Очекувам брзо адаптирање во машката екипа со оглед дека сум запознат со работата. Високите амбиции остануваат наша цел и во иднина за екипата да остане на позициите на кои е во моментот“, истакна Парондо.
Најголем дел од играчката кариера на Парондо е поврзана со шпански клубови. Настапувал за Хетафе, Алкобендас, Валјадолид, Адемар Леон (освоен КПК во 2005 година), Атлетико Мадрид (освоен Супер Глоуб во 2012 година) и Сиудад Реал по што четири години мина на унгарската сцена во тимовите на ПИК Сегед (освоен купот на ЕХФ во 2014 година) и на Будакалаш.
Наследникот на Гонзалес беше и шпански репрезентативец. За „фуријата“ одигра 74 натпревари и постигна 174 гола и беше дел од тимот што се закити со златен медал на Медитеранските игри во 2005 година во Алмерија. Играше и на мундијалот во 2007 година во Германија, а последниот настап за националниот тим на едно големо натпреварување го имаше на Европското првенство во Шпанија во 2012 година.