Шпанската влада денеска во Службен весник објави дека е разрешен началникот на каталонската полиција, ден откако оваа североисточна покраина прогласи независност, а каталонската полиција ги повика своите полицајци да се однесуваат „неутрално“.
Јусеп Луис Траперо, оперативниот командир на каталонската полиција е сменет во рамки на мерките кои Мадрид вчера вечерта почна да ги спроведува: смена на каталонската влада, преземање на управувањето над Каталонија и распишување на нови избори на 21 декември.
Луис Траперо последните недели стана значајна личност во каталонската криза. Тој во август беше народен јунак кој се справуваше со вонредната безбедносна ситуација по џихадистичките напади со 16 жртви во Каталонија, а денес Мадрид го товари за пасивност во текот на протестите против шпанската полиција.
Во пораката која ја објави каталонската полиција адресирана до нејзините членови, пишува полицијата да се однесува неутрално и да не зазема страна во судирот. Пораката доаѓа откако во каталонската полиција завладеа недоверба помеѓу оние кои ја поддржуваат независноста и тие кои се против неа.
„Со оглед на тоа дека постои реална можност за собири на граѓани на целата територија и луѓето да имаат различни ставови, мораме да ги потсетиме дека наша одговорност е да им гарантираме сигурност на сите и да овозможиме собирите да се одржат без нарушување на јавниот ред и мир“, пишува во пораката до каталонската полиција.
Високиот шпански суд минатата недела му забрани на Траперо да ја напушти Шпанија и му го одзеде пасошот, иако не нареди негово апсење.