Италијанецот добил покана од ФА да присуствува на вечерашниот меч со Малта, па затоа се поврзува и како наследник на Сем Алардајс

 

Може ли Роберто Манчини да биде конечен избор за селектор на Англија? – Опцијата е веројатна и би можела наскоро да биде и официјализирана ако се суди по веста што ја објави „Скај Спорт“.

Италијанецот добил покана од Фудбалската асоцијација (ФА) на Англија да биде гостин на дуелот против Малта вечерва. Ова беше доволна причина за медиумите на Островот да тргнат со шпекулации за преговори меѓу двете страни за конкретна соработка. Англија во моментот е со в.д. селектор.

Во таквата улога е Герет Саутгејт, предводник на У21 репрезетацијата, но ФА е во потрага по долгорочно решение по коруптивниот скандал на Сем Алардајс што изби во јавноста и резултира со отказ. Во Манчини се гледа човек што добро ги познава фудбалските прилики во Англија.

Тој четири години беше менаџер на Манчестер сити и во неговиот мандат на „Етихад“ беше прославена првата шампионска титула по пауза од 44 години. Трипати ги предводеше „граѓаните“ и до трофеј во ФА купот. Ланската сезона беше на клупата на Интер.