Published: Thursday, June 23, 2022 14:26
На вториот ден од штрајкот во јавниот сектор, зголемување на платите за 2.880 денари ќе добијат сите 190 вработени во ЈП Дрисла. Куриозитет е што ова е најава за прво линеарно покачување на платите откако функционира ова јавно претпријатие.
– Почитувани, со оглед на тешката економска и социјална положба, ценовните шокови и инфлацијата која ја чувствуваат граѓаните, а во насока на нашите заложби за поддршка на стандардот и заштита на економската моќ на вработените, директорот на ЈП Дрисла, Јане Мицевски ќе предложи на Управниот одбор на јавното претпријатие носење на одлука за зголемување на платите. Носењето на позитивна одлука од страна на Управниот одбор ќе значи линеарно покачување на платите за сите 190 вработени во претпријатието од 2.880 денари, почнувајќи од месец јули 2022 година. Ова би било прво покачување на платата за сите вработени откако функционира самото претпријатие, информираа денеска од Дрисла.
Директорот на ова јавно претпријатие, Јане Мицевски, за НоваТВ
изјави дека кај сите членови на Управниот одбор има расположение на седницата закажана за 29 јуни да донесат одлука за зголемување на платите.
– Досега никогаш немало линеарно зголемување на платите на сите вработени, туку имало зголемување само на примањата на вработени на одредени позиции. Согласно зголемувањата на цените на основните прехранбени производи, енергенсите и друго, сите во Управниот одбор посакуваат да ги зголемат платите на 190те вработени во Дрисла, ни рече Мицевски, но не прецизираше колку изнесуваат платите на вработените во ова претпријатие.
(Љ.Б.)