Јавниот превоз во Скопје е една од клучните слабости на Градот, рече во изјава за медиумите Каја Шукова, кандидатка за градоначалничка на Скопје и потпретседателка на СДСМ.
Таа потсети дека ДПМНЕ и Аросвска ветувале нови еколошки автобуси, бесплатен јавен превоз и ред во јавниот сообраќај и напомена дека денес нема нови автобуси, а постојните се „стари, нечисти, доцнат премногу, а некогаш и не доаѓаат воопшто“. Шукова исто така посочи и дека дел од приградските линии се укинати или нередовни. И заклучи дека градскиот јавен транспорт е крајно небезбеден и во колапс.
Решавањето на јавниот превоз не смее да доцни ни ден повеќе! Тоа е услов за квалитетн живот на сите кои живеат во Скопје. И на тие што се возат и на тие што не се возат. На сите ни треба помалку метеж, добро поврзани општини ,пбрз, безбеден и одржлив јавен транспорт, транспорт кој не ги труе граѓаните на Скопје.
Решението за ова постои а јас, заедно со Градот ќе го реализирам! Како Градоначалничка на Скопје, итно ќе започнам со реализација на проектот БРТ, кој ќе обезбеди нова модерна мрежа на урбаниот транспорт во Скопје, преку коридори кои се резервирани само за автобуси. Проектот вклучува и набавка на нови еколошки автобуси и ревитализација на две депоа за автобусите, рече таа.
Шукова посочи дека за ова одамна се обезбедени 40 милиони евра од Европската банка за обнова и развој. Таа гарантира дека до средината на 2028 година, скопјани, од Ѓорче Петров, преку Центар до Ново Лисиче во Аеродром ќе се возат со првата линија на БРТ системот за само половина час.
БРТ обезбедува линија од 13 км во една насока, со 21 автобуска постројка и 2 терминали, со 29 автобуси, за неверојатен број од 65.000 патници на ден.
Ќе работиме и на втората линија север – југ, но и на набавка на нови еколошки автобуси за останатите сообраќајни линии низ Скопје, со што постојните стари и неефикасни автобуси ќе бидат целосно заменети.
БРТ е решението позади кое стојам и кое драстично ќе ја подобри состојбата со автобускиот превоз во Скопје. Ќе почнеме веднаш, за Скопје и скопјани!, посочи Каја Шукова кандидатката за градночалничка на Скопје од СДСМ.