Фудбалската федерација на Шведска ја откри замислата за искажување на благодарност кон Златан Ибрахимовиќ за неговиот придонес во националниот тим низ кариерата. Фудбалерот кој моментно настапува за Манчестер јунајтед ќе добие споменик што ќе биде поставен пред националниот стадион „Френдс арена“ во Солна, северно од центарот на Стокхолм, каде Швеѓаните ги играат своите мечеви како домаќини. Во него ќе биде и финалето на Лига Европа во 2017 година.
„Момчето од Розенгард ќе добие своја статуа во главниот град на Шведска. Тоа се случува, обично, кога некој ќе заврши кариера, но јас од секогаш бев посебен. Ви благодарам многу за ова“ рече Ибрахимовиќ.
Швеѓаните не откриваат кога планираат да ја постават статуата што е дело на скулпторот Петер Линде. Ибрахимовиќ е најдобар стрелец во историјата на шведската репрезентација со 63 гола.