Претседателот Си Џинпинг е сигурен дека Кина ќе го порази корона-вирусот кој досега однесе 106 животи, зарази над 4.000 лица, се прошири низ светот и ги растресе финансиските пазари. Но, и покрај неговата убеденост, меѓународниот аларм е се посилен, па Владите од Франција до Јапонија почнуваат да организираат евакуации, пренесуваат светските агенции. Властите во Хонг Конг, каде се месеци траат протести, планираат да ги прекинат железничките и траектни врски со континентална Кина.
Американската амбасада во Пекинг сооопшти дека персоналот од конзулатот во Вухан, град во централна Кина со 11 милиони жители во кој изби епидемијата, денеска ќе биде евакуиран со чартер лет. Европската унија ќе испрати два авиона за евакуација на најмалку 350 здрави лица на ЕУ од Вухан, соопшти Европската комисија. Првиот авион по 250 француски државјани треба да полета денеска од Париз.
Кинескиот претседател Си Џинпинг вчера во Пекинг оствари средба со генералниот директор на Светската здравствена организација (СЗО), Тедрос Адханом Гебрејесус, по која соопшти дека Кинезите во моментот сериозно се борат со епидемијата.
„Вирусот е ѓавол и не може да му дозволиме да се сокрие. Кина ќе ја засили меѓународната соработка и го поздравува учеството на СЗО во првенција од вирусот. Кина е сигурна дека ќе победи во оваа борба. Безбедноста и здравјето на луѓето се најважни, затоа контролата на ширењето на вирусот е наша основна задача во моментот“, рече кинескиот претседател.
Агенцијата „Ројтерс“ наведува дека инвеститорите се загрижени за влијанието врз втората светска економија по големина по забраната за патувања и продолжението на кинеските новогодишни празници. Вредноста на акциите во светот е во надолен тренд, кинескиот јуан е најслаб од почетокот на годината додека цената на нафтата е најниска во последните три месеци.
Корона-вирусот кој е сличен на грипот се прошири низ светот, но ниту еден од 106 досега регистрирани смртни случаи не е надвор од Кина. Најновиот потврден случај на зараза доаѓа од германската покраина Баварија, што е четврти засега во Европа. Заразен е маж кој вирусот го добил од негова колешка од Кина која дошла во посети. Таа, наводно, немала симптоми додека не се вратила во Кина.
Јапонските власти соопштија дека регистрирале случај на коронавирус кај возач на автобус кој во текот на месецот превезувал туристи од Вухан.
Бројот на заразени во Кина се зголеми на околу 4.800 лица за разлика од 2.835 колку што беа евидентирани во претходните денови. Корона-вирусот, познат како „2019-нЦоВ“, може да предизвика воспаление на градите и други респираторни инфекции се пренесува од човек на човек преку кашлање и кивање, а периодот на инкубација трае 14 дена.