Силен земјотрес го погоди југозападниот дел на Перу доцна синоќа, при што загина најмалку едно лице, а неколку други се повредени, јавува германската новинска агенција ДПА.
Перуанскиот геофизички институт (IGP) соопшти дека земјотресот бил со магнитуда од 5,1 степени според Рихтеровата скала, додека Американскиот геолошки институт (USGS) ја процени јачината на 5,5 степени.
Според IGP, потресот се случил во 21:24 часот по локално време, на длабочина од 24 километри, јужно од градот Чупака во истоимената покраина.
Според првичните медиумски извештаи, во погоденото подрачје се урнале неколку згради. Потврдена е смртта на најмалку едно лице, а има и повеќе повредени.
Заедно со Чиле и Еквадор, Перу се наоѓа во Пацифичкиот огнен прстен, сеизмички најактивното подрачје на Земјата.