Десетици илјади домаќинства и компании останаа без електрична енергија, оштетени се згради и искорнати се дрвја како последица на силното невреме што втор ден по ред го погоди западниот брег на Австралија. Засега нема извештаи за повредени или загинати во бурата каква, според Џон Брумол, официјален претставник на Одделот за противпожарни и итни случаи на Западна Австралија, се случува еднаш во десет години.
Бурата погоди област од 1.200 километри на западниот брег на Австралија од Карнарвон до Кејп Луин, вклучувајќи го и главниот град на таа австралиска држава Перт, со налети на ветрот од над 90 километри на час во текот на ноќта, изјави првиот човек на Бирото за метеорологија, Нил Бенет. Брзината на ветерот достигна и 132 километри на час на Кејп Луин, што е најсилната брзина забележана во мај уште од 2005 година.
Обилните дождови го погодија крајбрежјето, а дождот и брановите високи осум метри предизвикаа поплави на брегот, рече Бенет. Бурата се движеше по должина на брегот, вклучително и областа околу Перт, но особено го погоди југозападниот дел на државата Западна Австралија.
Околу 65.000 домаќинства и фирми останаа без електрична енергија среде невремето, но во меѓувреме, за многумина е воспоставено снабдување, додека 24.000 домаќинства сè уште немаат електрична енергија, рече премиерот на Западна Австралија, Марк МекГуан.