Амбасадорот на Италија, Андреа Силвести истакна дека Рим ја поддржува европерспективата на сите држави од Западен Балкан. Северна Македонија, рече италијанскиот амбасадор, направи многу и Советот на ЕУ во март во 2020 година реши дека треба да ги почне преговорите за членство. Сепак, вели, останува уште многу и да се постигне бидејќи европската интеграција е процес.
– Од тие причини, сите чекори треба да се преземат внатрешно во однос на реформите, законодавството да се усогласи со акито на ЕУ, агендата со реформи треба да продолжи и ова може да се направи на регионално ниво. Ова е пристапот што Италија силно го поддржува, нагласи амбасадорот Силвестри.
Италија е меѓу главните економски инвеститори во регионот за кој, Силвестри истакна дека е од стратешка важност за Рим и затоа поддржуваат иницијативи како ЦЕИ, Јадранско-јонската, а ја нагласи и важноста на инфраструктурното поврзување.
– Многу е важно да заврши и Коридорот 8 кој се вкрстува со Коридорот 10. Тоа е можност за вашата држава и вие треба да делувате како регионален центар, не само како една држава во која се вкрстуваат патиштата, туку навистина да станете држава центар. Мора напорно да работите за дополнително да привлечете инвестиции, рече Силвестри.
Поголемата регионална соработка, додаде, ќе овозможи поефективно да се решат некои другу заеднички предизвици како борбата против трговијата со луѓе, климатските промени, тероризмот, итн. Инфраструктурата и регионалната соработка се предуслов за економскиот прогрес, но само тие не се доволни, потребно е да се вклучат и граѓаните и укажа дека на конференцијата за иднината на Европа треба да учествуваат и земјите од регионот, особено младите, порача Силвестри.