Диего Коста и официјално се врати во Атлетико Мадрид. Трансферот на шпанскиот напаѓач од Челзи е комплетиран во пресрет на вечерашната пресметка меѓу двата тима на „Ванда Метрополитано“ во рамки на Лигата на шампиони.
Договорот е постигнат за сума од 60 милиони евра што е рекордна во историјата на тимот од Мадрид. Коста веднаш се приклучи на тренинзите на „јорганџиите“, а на право на настап ќе мора да почека до јануари. Првите шест месеци ќе се води како позајмен фудбалер од Лондон по што Атлетико презеде обврска за соработка на три ипол години од јуни во 2018 година.
Пред да замине во Челзи пред нешто повеќе од три години, Коста беше важна алка во синџирот на Атлетико во освојувањето на Примера и кралскиот Куп. И лондонската епизода во неговата кариера беше успешна. Постигна 59 гола во 120 настапи за „сините“ од „Стемфорд бриџ“ со кои се радуваше и на два трофеја во Премиерлигата.