Симоновски: Пожарот во Автокоманда е скоро целосно изгаснат, гореше напуштен објект

Густ чад од пожар вечерва ги вознемири жителите на скопската населба Автокоманда, но како што информира командирот на скопската противпожарна единица, Владимир Симоновски, за НоваТВ, пожарот е веќе локализиран и набргу ќе е целосно изгаснат.

– Станува збор за напуштен објект позади поранешната плинара на улица „Романија“ бб, каде се наоѓа и нашата противпожарна единица во Автокоманда. Реагиравме веднаш, а гореше кровна конструкција, изјави Симоновски.

Причините за пожарот допрва ќе се утврдуваат, а неофицијално ќе се работи и на верзијата да излегол од контрола оган кој евентуално го запалиле бездомници, кои често престојуваат во напуштениот објект.