По двонеделниот штрајк кој предизвика различни коментари во јавноста, синдикатот на образованието се најде под жесток притисок да ги прифати понуденото 10 отсто зголемување на платите кое во сума изнесува околу 2.500 денари.
Премиерот Димитар Ковачевски пред малку остро реагираше дека одбивањето на понуденото покачување е уцена од страна на синдикатот.
„Со одбивањето на понудата за покачување на платите од 10 отсто, СОНК реши да продолжи со уцени кои се единствено на штета на образованието на учениците и им го отежнува секојдневието на родителите. И во вакви тешки услови на светска криза, ние сме веројатно единствената Влада која овозможи историско зголемување на платите и пензиите и силно финансиски ги поддржа граѓаните. Но, и покрај сѐ, синдикатот смета дека покачувањето на платите од 2.500 денари е малку. Во услови кога со антикризните мерки кои ги донесе владата сметките на граѓаните се помали за 4.000 денари месечно. Ова едноставно не може да се смета за разумен став туку за очигледен притисок со што е евидентно дека СОНК личните интереси го става пред оние на децата“, реагира премиерот.
Ковачевски вели и дека од 2017 година платите во образованието се зголемени за 21 процент. „Со овие дополнителни 10 отсто тоа би биле 31 отсто покачување кои за СОНК не се доволни. За споредба, за пет години, од 2011 до 2016 година платите во образованието беа покачени за само 4 отсто“, порача тој.
И коалицискиот партнер ДУИ настапи со слична осуда кон синдикатот обвинувајќи го за политичка агенда против учениците и родителите.
„Одбивањето на зголемувањето за 2.500 денари или 10 отсто на платите од страна на обединетиот Синдикат за образование, наука и култура како и методологијата за постепено зголемување и трајно решавање на социјалниот статус на образовниот кадар, е политичка агенда против учениците и родителите“, соопшти партијата.
Демократската унија за интеграција, од чии редови е министерот за образование Јетон Шаќири смета дека со одбивањето на понудата дадена од Владата, синдикатот ги става личните интереси над интересите на учениците, додека штетата оди на сметка на наставниците и учениците.
„Нетолерантно е да не се одржува настава во услови како денешните кога цел свет се соочува со пандемијата, економската и енергетската криза, додека Владата и Министерството за образование прават максимални напори за нормализирање на образовниот процес“, реагира ДУИ повикувајќи го наставниците и учениците да се вратат во училниците. (Р.Н.)