Вториот ден од Фестивалот на европски филм денеска продолжува со проекциите на филмовите „Непозната девојка“, „Сиера Невада“, „Јас Даниел Блејк“ во киното Милениум, „Чисти раце“, „Жалејка“ и „Влажност“ во киното Фросина, додека во Џебното кино МКЦ на репертоарот е „Странецот“.
Во Скопје денеска доаѓа и романскиот режисер Кристи Пују да го претстави својот последен филм „Сиера Невада“ кој е копродукција меѓу Романија, Франција, БиХ, Хрватска и Македонија. Филмот е инаку и романски кандидат за Оскар.
Во сабота (12.11.16) во Скопје доаѓа и словенечкиот режисер Дамијан Козоле за промоција на неговиот филм „Ноќен живот“ кој исто така е и македонска копродукција, а во филмот меѓу другите игра и нашиот Петар Арсовски.
Викендов меѓу останатото ќе може да ги погледнете и најновите филмови на Џим Џармуш – „Петерсон“ и на Вим Вендерс – „Убавите денови во Аранхуез“, како и филмот „Матура“ за кој романскиот режисер Кристијан Мунџиу годинава во Кан ја доби наградата за најдобра режија.
https://www.youtube.com/watch?v=9xezKRZLPU4
На програмата се и повеќе филмови од официјалната селекција, СинеБалкан, музички докуметарци, ревијата филмови на Орсон Велс и детски филмови, а секоја вечер во МКЦ има и музички перформанси.
Вечерва (11.11.16) специјален аудио – визуелен перформанс „Cineskapes”, во сабота (12.11.16) Anthony Rother, легенда на светската електронска сцена, а во недела (13.11.16) Давид Ангеловски Пиколомини, човекот кој стоу зад прекрасни изданија на македонската современа музичка сцена.
Организаторот денеска информира дека од технички причини се откажуваат проекциите од ЛГБТ програмата која требаше да стартува од утре, сабота 12 ноември во Џебното кино на МКЦ.
Програмата ќе биде дополнително реализирана по завршувањето на фестивалот во соработка со Амбасадата на Шведска, се вели во соопштението.