Германскиот филм „Тони Ердман“ на режисерката Марен Аде и драмата „Рај“ на Андреј Кончаловски се проекциите кои овој петок во рамките на Cinedays ќе се прикажуваат во кината.
„Тони Ердман“, кој е во трка за „европскиот оскар“ ќе се прикажува во 16.30 во кино Фросина, додека „Рај“, освојувач на „Сребрената палма“ за режија на филмскиот фестивал во Венеција, ќе се прикажува во киното Милениум во 22 часот.
Во кино Фросина е и филмот „Од онаа страна“ на Зринко Огреста кој освои седум Златни арени на Филмскиот фестивал во Пула, меѓу кои за најдобар филм и најдобра режија, а главниот актер Лазар Ристовски за најдобар актер.
Во Милениум пак, пред „Рај“, предвидена е и проекција на филмовите „Џган“ (17.30) и „Гениј“ (20 часот).
Во рамките на придружната програма од 18 ти до 20 ти секој ден во МКЦ, во 11 часот ќе се одржуваат работилници за продукциски дизајн со уметничките директори, Сара Холдрен и Лора Бишоп.
Во сабота ќе бидат прогласени најдобрите во Официјалната селекција и СинеБалкан.
Фестивалот се затвора со проекција на филмот „Устав на Република Хрватска“ на Рајко Грлиќ во кој копродуцент е и Македонија. Во Скопје ќе бидат и српските актери Небојша Глоговац и Дејан Ачимовиќ. Меѓу другите, во филмот глуми и нашата Јелена Јованова, а музиката е на Дуке Бојаџиев.
Саботната вечер е резервирана за холивудската ѕвезда Илајџа Вуд, најпознат по улогата на хобитот Фродо во трилогијата „Господарот на прстените“, кој доаѓа во Скопје со концерт како дел од музичкото дуо во кое членува, Wooden wisdom.