Прва Г7 средба на културата помеѓу седумте најразвиени земји се одржа на 30 и 31 март во Фиренца. Знак дека меѓународната заедница се мобилизира за заштита на светското наследство на човештвото во областите во кои има војни и области во кои се случуваат природни катастрофи.
Пред една година беше креирана првата специјална сила за интервенција на иницијатива на Италија и УНЕСКО наречена “сини шлемови на културата”. Во неа учествуваат шеесетина експерти кои имаат задача да интервенираат низ целиот свет на барање на УНЕСКО или на барање на земјата жртва во воен конфликт или природна катастрофа.
“Светското наследство треба да се спаси” е слоганот на оваа прва средба на Г7 на културата. Средбата ја иницираше Италија со желба да покаже дека сака да игра главна улога во заштитата на светското културно наследство.
“На почетокот на овој проект ние во Владата направивме проценка која покажа дека Италија поседува светски културен лидершип поради богатството на нашето историско наследство. Италија сака оваа акција да ја претвори во меѓународен план за да може поимот на културна дипломатија да влезе во агендите на сите нации”, изјави Дарос Фраческини, италијанскиот министер за култура.
“Намерното уривање на светското наследство е воено злосторство. Тоа стана воена тактика која има за цел да ги ослабне општествата и да ги парализира заедниците, да шири омраза и одмазда преку стратегија на културно чистење”, изјави Ирина Бокова, директорката на УНЕСКО.
Оваа Г7 средба доаѓа по конференцијата во Лувр во Париз која се одржа од 20 до 24 март на која учествуваа Саудска Арабија, Франција, Обединетите арапски емирати и УНЕСКО. Беше одлучено да се соберат 100 милиони долари до 2019 година за заштита на светското наследство во областите во кои има конфликт и тоа без географски ограничувања и за сите закани како уривање, кражба, шверц.
На оваа конференција беше подвлечено дека нападите врз светското културно наследство може да биде злосторство против човештвото и воен криминал според меѓународните закони па според тоа, авторите можат да бидат изведени пред суд.
Минатиот септември еден џихадист од Мали беше осуден на 9 години затвор од страна на Меѓународниот кривичен суд во Хаг поради уривање на мавзолеите во Томбукту.
Оваа прва Г7 средба на културата беше еден вид вовед во цела серија Г7 тематски средби. Тие ќе се одржуваат на маргините на Г7 средбите на шефови на држави и влади и ќе се однесуваат на животната средина, транспортот и здравството. Следната средба на Г7 е закажана на26 и 27 мај 2017 година во Таормина на Сицилија.