Војската на САД утре треба да се повлече од Авганистан, земја во која ќе остави оружје и воена опрема во вредност од 85 милијарди долари, напиша на синот на поранешниот американски претседател Доналд Трамп на Твитер.
„Воена опрема во вредност од 85 милијарди долари ќе биде оставена на талибанските терористи. Тоа значи дека секој Американец, маж, жена, дете, придонел со околу 265 долари за нивната терористичка кауза, врз основа на фактот дека САД е дом на околу 320 милиони луѓе. Браво, демократи“, напиша Трамп јуниор, придружувајќи ја пораката со табела на американскиот ревизорски суд, која укажува на бројот на специфично оружје и опрема.
Според оваа табела, Американците во Авганистан ќе остават 22.174 џипови Хамви, 634 оклопни транспортери, 155 возила MxxPro со зголемена заштита од мини, 169 оклопни возила М113, 42.000 пикапи и оклопни возила, 64.363 митралези, 8.000 воени камиони, 162.042 преносни уреди за ноќно гледање, 358.530 пушки, 126.295 пиштоли, 176 топови.
Покрај тоа, оставени се и 33 хеликоптери „Ми-17“, 33 хеликоптери „Блекхок“, 43 хеликоптери „МД530“, четири воени транспортни авиони Ц130, 23 авиони „Ембраер-314“, 28 авиони „Цесна 208“ и 10 авиони „Цесна АС-208“.