Поранешната заменичка на министерот за правда, Билјана Бришкоска му се јавила на Трајко Вељаноски да се отворат вратите од Собранието, сведочеше во судот обвинетиот Александар Василевски Нинџа. Тој кажа дека сите насоки за 27 април доаѓале од штабот на ВМРО ДПМНЕ.
На 27 април, Нинџа влегол во штабот на ВМРО ДПМНЕ околу 18 и 10 и таму бил како што рече ,,командно оперативниот штаб“ на ВМРО ДПМНЕ односно присутни биле Бришкоска, Спиро Ристовски, Миле Јанакиески, Кирил Божиновски и Митко Чавков – тогаш директор на Бирото за јавна безбедност. Телевизорот бил на ТВ Нова и присутните го гледале директниот пренос од протестите. Како се доближувала толпата кон Собранието, присутните давале насоки.
Бришкоска разговарала со Вељаноски и рекла дека ,,пратениците не си ја завршиле работата и не предизвикале инцидент“. Спиро Ристовски разговарал со водачот на протестите Богдан Илиевски Бетмен, Јанакиески со пратениците во Собранието, а Кирил Божиновски контактирал со општинските комитети на ВМРО ДПМНЕ и ги повикувал веднаш да дојдат во Скопје
Чавков разговарал телефонски со началникот на СВР Скопје и со сега обвинетиот Митко Пешев и им давал насоки пасивно да делуваат. Според Нинџа, Чавков изгледал исплашено.
-Видов страв кај него, рече Нинџа.
Во штабот на ВМРО ДПМНЕ дошол и тогашниот директор на УБК Владимир Атанасовски и Нинџа заедно со него го напуштиле штабот околу 19.10 часот. Сите останати останале таму.