Специјалното јавно обвинителство информира дека поранешната министерка за внатрешни работи, Гордана Јанкулоска, денеска била во својство на осомничено лице да даде исказ за случајот „Титаник.“
Јанкулоска побарала увид во доказите поради што повторно ќе биде повикана.
„Титаник“ инаку е првиот случај на СЈО, а се однесува на кривични дела поврзани со изборите и гласањето.
Осомничени се поранешните министри за внатрешни работи и за транспорт и врски и поранешниот секретар на владата, кои се осомничени за злоупотреба на изборите и гласањето за да победи одредена политичка партија.
Осомничени се и судии и поранешни членови на ДИК.
Таа денеска обвини дека СЈО одамна го загубил кредибилитетот да води било какви постапки поврзани со правото, бидејќи станале алатка на СДСМ употребувана за нивни цели.
„При разрешувањето на политичката криза на Зоран Заев му е потребна помош и тука е СЈО да излезе со нешто што оди во прилог на опозицијата и очигледно е дека ги подобруваат позициите на Заев“, изјави Јанкуловска.
Иако СЈО го обвини за политичка пресметка со неа, таа кажа дека сепак дошла во обвинителството бидејќи тоа претставува државна институција.