Специјалното јавно обвинителство до Советот за утврдување на факти, поднесе претставки за утврдување на одговорност на судиите Елена Илиевска – Јосифовиќ и Татјана Михајлова. Со претставките е побарано да се испита работата на судиите од аспект на нестручно и несовесно вршење на судиската функција.
Како што пишува во образложението на претставката, таа е поднесена поради нестручно и несовесно работење на судијката Елена Илиевска Јосифовиќ од одделението за организиран криминал. Во образложението на СЈО се вели дека таа постапките ги водела пристрасно, со злоупотреба на положбата и пречекорување на службените овластувања. Исто така, објаснето е и дека судијката постапувала несовесно, ненавремено и немарно што предизвикало одложување на судската постапка без постоење на законски основ. Според СЈО ваквото однесување на Илиевска – Јосифовиќ се повторувала во повеќе случаи кои таа ги води за ова обвинителство.
Случајот за кој Илиевска – Јосифовиќ ја доби претставката е „Трезор“ во кој осомничен е поранешниот шеф на УБК, Сашо Мијалков.
За судијката Михајлова, претставката е поднесена за случајот Насилство во општина Центар во кој обвинети се Никола Груевски, Миле Јанакиески, Даниела Рангелова и други лица.
Во образложението се вели дека Михајлова, постапката ја водела пристрасно, особено во однос на еднаквиот третман на странките, со намерно повредување на правилата за правично судење, злоупотребување на положбата и пречекорување на овластувањата.
„Основаноста и неодложноста на потребата од покренување на постапка за утврдување на одговорност за вршење на судиска функција од страна на Михајлова произлегува од фактот дека постапката се наоѓа во фаза кога е закажана главна расправа, што значи дека обвинителниот предлог не е отфрлен, но сепак судијката оневозможува да се започне главна расправа“, се вели во образложението.