Бројот на барања кои граѓаните ги упатуваат до Специјалното јавно обвинителство секој ден е се поголем, информираат од Специјалното јавно обвинителство.
До денес пристигнати се вкупно 81 барање со кои граѓаните се интересираат дали нивните телефонски броеви биле предмет на незаконско следење на комуникациите. Барањата се однесуваат за вкупно 245 телефонски број“, пишува во соопштението на СЈО.
Од обвинителството велат дека секое заинтересирано лице може писмено да се обрати до СЈО, да го наведе телефонскиот број за кој се сомнева дека е прислушуван. Во барањето треба да бидат наведени имињата на лицата кои ги користеле телефонските броеви и контакт податоци за нив. Барањата, граѓаните можат да ги достават лично, по електронска пошта или по пошта.
„По однос на сите досега поднесени барања за проверки на телефонски броеви ја известуваме јавноста дека истрагата е во тек и кога ќе бидат обезбедени сите докази, подносителите на барањата ќе бидат известени за резултатите од истрагата. Во оваа насока појаснуваме дека лицата за кои ќе се утврди дека користеле телефонски броеви кои биле предмет на незаконско следење на комуникациите, како и лицата за кои ќе се утврди дека биле соговорник на незаконски следен телефонски број ќе бидат повикани во својство на оштетени лица“, наведено е во соопштението.
СЈО информираат дека наскоро ќе излезат со повеќе информации за останатите предмети кои ги работи обвинителството.