Англискиот селектор наседна на новинарски блеф, фудбалската асоцијација е принудена на в.д. решение до изнаоѓање на предводник на долг рок. Сем Алардајс поднесе оставка на кормилото на Гордиот Албион по само 67 работни дена. Летово го наследи Рој Хоџзон по Европското првенство во Франција, но се повлекува по наивното паѓање во замка што ја сместија новинари на британски телеграф. Се претставија како дел од компанија од Далечниот Исток и побараа средба со селекторот на Англија од која ги открија неговите корумпирани апетити.
На наместената средба побараа од Алардајс совет за заобиколување на правилата за трансфер на фудбалери што за таквата советодавна улога се обиде да наплати речиси 500.000 фунти. На крај памет немаше дека се е снимено. Материјалот веднаш излезе во јавност, а Алардајс се најде на зидот на срамот. Ниту момент не размислуваше за последиците, презеде одговорност, се извини на челниците на Фудбалската асоцијација, но веќе беше доцна. Оставката беше неизбежна и ја поднесе, гест што беше прифатен и од ФА.
„По разговор во асоцијацијата одлучив да заминам по последните случувања. Чест ми беше да бидам англиски селектор. Разочаран сум од текот на настаните, се сретнав со луѓето од Сојузот, се извинив и се разделивме. Свесен сум за срамот што го предизвикав со моите коментари. Полицијата побара објаснување за моите зборови на снимката и за контекстот на средбата пришто соработував во целост“, наведе Алардајс во изјава за медиумите. ФА на негово место го назначи Герет Саутгејт за в.д. селектор за наредните четири меча на англиската репрезентација.
За скандалот со Аладрајс, Телеграф ја посвети целата насловна страница. Фудбалскиот стручњак во минатото се поврзуваше со матни игри додека беше менаџер на Болтон.