Групирањата на луѓето и непридржување до мерките е причината за драстичното зголемување на бројката на заболени со ковид-19 во тетовскиот регион и создавање на нови кластери. Вака Наим Скендери, специјализант по епидемиологија при Центар за јавно здравје во Тетово, ја окарактеризира големата бројка на новозаболени лица во градот.

„Денеска имаме 10 нови случаи во Тетово и околината. Повеќето од нив се луѓе кои биле во контакт со заразено лице, но има и нови кластери што е најголемиот ризик за зголемување на бројот на заболени. Имаме три нови кластери, а вкупната бројка е околу 25 кластери. Најголем број од случаите доаѓаат од Општините Тетово и Боговиње со околните села, истакна Скендери. 

Тој посочи дека луѓето не треба да се релаксираат и да се придржуваат до мерките, бидејќи коронавирусот е сè уште тука.

„Епидемиолошката ситуација во Тетово и во околината не е добра поради тоа што граѓаните, за жал, не ги почитуваат мерките кои се дадени од Министерство за здравство и Институт за јавно здравје. Нашиот апел за периодот што следува ќе биде ист како и досега, да нема собирање во групи, да нема одење во фамилијарни посети и задолжително носење на маски и физичка дистанца меѓу луѓето. Исто така да се избегнат и големи собири пред банки и пошти во градот“, нагласи Скендери.

Според податоците на Министерството за здравство, во тетовскиот регион досега се забележани 161 заболено лице од ковид-19, активни се 73 случаи додека бројот на починати лица е 15.