Камил Штох е нов рекодер на Планица со прескокнати 251,5 метри. Но, Полјакот, кој има две златни олимписки одличја, не беше и единствениот учесник во натпреварот на леталницата во Словенија што е последен за оваа сезона во Светскиот куп.
Неколку минути пред него, рекорд на Планица постави Австриецот Штефан Крафт со 251 метар. И тоа не беше се. Серија на рекордни летови, три во еден ден, ја отвори Норвежанецот Роберт Јохансон кој доскокна на 250. метар што беше за метар и половина подолга изведба од дотогаш најдоброто остварување на Словенецот Петер Превц од 2015 година.
Ова, секако, е одлична увертира за утрешниот натпревар во кој Штох и Крафт ќе атакуваат на големиот Кристален глобус. Австриецот влегува во завршната битка како лидер во генералниот пласман во Светскиот куп со 86 бода повеќе пред Полјакот.
Финалето на Планица е закажано за утре претпладне во 10 часот.