Иницијативата е од скопјанец кој има потекло од Велес, а кој ни кажа колку го трогнала веста дека е ограбена градинка. Денеска напладне дојде овој хуман граѓанин и ѝ испорача на нашата установа дел прехранбени артикли, за што сме му благодарни, изјави Велиновска
Граѓанин од Скопје денеска донираше брашно, масло, шеќер, сок, на градинката „Димче Мирчев“ од Велес чија главна кујна вчера беше опљачкана. Крадците, како што објавивме, викендов го скршиле прозорецот и влегле од задниот влез, по што ја одзеле сета храна наменета за 1.200 деца кои ги посетуваат објектите на оваа установа. Претходно ги исклучиле сите кабли, па затоа не се вклучиле камерите и алармниот систем.
Директорката на градинката, Маја Велиновска, ни изјави дека по кражбата, денеска се јавил граѓанин заинтересиран да донира храна.
– Иницијативата е од скопјанец кој има потекло од Велес, а кој ни кажа колку го трогнала веста дека е ограбена градинка. И еве денеска напладне дојде овој хуман граѓанин и ѝ испорача на нашата установа дел прехранбени артикли, за што сме му благодарни, изјави Велиновска за НоваТВ.
Таа додаде дека уште веднаш по кражбата, ги порачале неопходните количества прехранбени артикли за континуирано да бидат обезбедени оброци за децата, кои ниту вчера не останале гладни. Ќе бидат ставени и нови решетки на прозорците, според директорката, но ќе бидат преземени и други мерки за поголема заштита на установата, која се грижи за 1.200 деца во шест објекти.
Од градинката „Димче Мирчев“, која се наоѓа на десетина метри од градскиот пазар, викендов беа украдени околу 100 килограми брашно, 10 пакети зејтин, сол, шеќер, над 20 пакетчиња сирење и други прехранбени артикли. Штетата изнесува 50.000 денари.
Од СВР Велес ни изјавија дека истрагата за овој случај е сѐ уште во тек.
(Љ.Б)