Во рамки на тродневната посета на Турција, градоначалничката на Скопје, Данела Арсовска, имаше средба со градоначалникот на градот Конја, Угур Ибрахим Алтај, на која се потпиша протокол за соработка, а како гест и потврда за воспоставените пријателски односи и соработка, градоначалникот Алтај за потребите на Противпожарната бригада на град Скопје ќе обезбеди противпожарно возило.

„На работните средби кои ги остваривме во градот Конја договоривме конкретна соработка со градоначалникот Алтај, при што морам да го потенцирам пријателскиот и пречек и од желбата за интензивирање на билатералната соработка, која резултираше со гест на потврда на овие заложби од страна на Градот Конја, со доделување на противпожарно возило за потребите на Противпожарната бригада на градот Скопје“, изјави скопската градоначалничка.

Противпожарната служба во градот Конја опслужува територија над 42.000 квадратни метри, што ја покриваат 1000 пожарникари и над 2000 волонтери кои се грижат за безбедноста од пожари на околу 3 милиони граѓани во градот.

„При посетата на противпожарната служба во градот Конја, имавме средба со командантот Џевдет Ишбитриџи на која разговаравме за можностите за соработка на заеднички проекти и обуки, но имавме и прилика да ја видиме нивната техничка опременост во функција на заштита на околу три милиони граѓани во градот“, вели Арсовска.