Сообраќајот по обиколницата од клучка Хиподром до клучка Сарај е во прекин синоќа од 20 часот поради обилните врнежи од дожд и надојдената вода.
Диспечерски информативен центар на ЈП Македонија пат и Авто мотосојузот утрово соопштија дека прекинот ќе трае до завршување на активностите околу нејзино расчистување.
На таа делница синоќа беа заглавени стотици автомобили, а за спасување на луѓето беа ангажирани специјалните единици на МВР.
Од 1.45 ноќеска прекин на сообраќајот има на автопатот Гостивар-Тетово-Скопје кај клучка Југ, патничкиот сообраќај е пренасочен преку градско подрачје до клучка Север.
Сообраќајот на останатите државни патишта во Македонија се одвива без забрани, по влажни коловози.
Интензитетот на сообраќај на патните правци надвор од градските средини е зголемен.
Според утринскиот извештај на АМСМ, на граничните премини нема задржувања подолги од половина час за влез и за излез од државата.