Скринингот во училиштата нема да продолжи.
Нема потреба да продолжи скринингот кај учениците, рече министерот за здравство Беким Сали, посочувајќи дека согласно добиените резултати од скринингот кој спроведе минатата недела во неколку основни училишта, процентот на инфицирани ученици бил многу мал. Тој напомена дека бројките на новозаразени секојдневно се следат и оти сега се наоѓаме во фаза на смирување на четвртиот бран.
„Според досегашните резултати сметаме дека нема потреба да се продолжи со скринигнот, затоа што ја постигнавме целта. Баравме од овој скрининг да видиме колкав е процентот на новоинфицирани деца, гледаме дека бројката е многу мала, 0,8 отсто, така да нема потреба од продолжување со скринингот. Секојдневно ги следиме бројките, така да сметаме дека сме во фаза ан смирување на четвртиот бран“, изјави Сали по одбележувањето на Денот на ретки болести.
На новинарско прашање дали на утрешната седница на Комисијата за заразни болести ќе се предложи дополнително олеснување на мерките, министерот посочи дека прво ќе се направи анализа на епидемиолошката состојба и таа ќе даде насока во кој правец ќе се движиме.
„Серолошкиот скрининг ќе ни даде дополнителна информација како да постапуваме. Секако, ние ќе правиме анализа на состојбата која се случувала минатата недела, и ќе одлучиме за идната недела во зависност од резултатите од скринингот“, додаде Сали.
Тој напомена дека засега не може да каже дали ќе има олеснителни мерки во однос на тргање на маските на децата од училиштата, како ќе постапат во идниот период зависи од утрешниот состанок на Комисијата за заразни болести.
По повод одбележување на денот на ретките болести, министерот рече дека и оваа година очекува со ребалансот по потреба да се зголеми буџетот за терапија на пациенти со ретка болест.