Министерот за образование и наука Јетон Шаќири нема информација кога ќе почне скринингот на учениците, меѓутоа вели дека процесот е во тек и најверојатно ќе се реализира во следниот период.
– Немаме информација од Министерството за здравство, но тие соработуваат со Комисијата за заразни болести. Денеска има состанок, сигурно во наредниот период може да го организираат и скринингот. Нема никаква информација денеска кога почнува, изјавил Шаќири.
Важно е, вели тој, дека процесот е во тек и оти со добрата комуникација, децата веднаш по пројавување симптоми не одат на училиште.
– Сега сме во другата фаза во образовниот процес и мислам дека сите со добра соработка ќе може да ја поминеме и новата варијанта на вирусот и да дојде крајот на омикрон во нашата земја, рече Шаќири.
Прашан зошто учениците од државната математичко-информатичка гимназија се на онлајн настава и добиле информација дека училиштето нема затоплување, министерот вели дека добил ветување дека за најбрзо време ќе се реши овој проблем.
– Делот на образованиот процес се менаџира и од локалната власт, во конкретниот случај во директна комуникација се Градот Скопје со ова училиште, рече Шаќири додавајќи дека како министер ја разбира целата ситуација со училиштето и се разгледуваат сите можности истото да се поврзе преку БЕГ за да се избегне оваа проблематика.
Други вакви проблеми, како што рече, нема. Посочи дека во петокот имал состанок со градоначалниците и оти никој од присутните на средбата не се пожалил за проблем од технички аспект.