Конфедерацијата на слободните синдикати денеска со соопштение побара надлежните да го санкционираат, како што велат, вулгарниот однос на собранискиот спикер Талат Џафери кон вработените.

„Вчерашниот настан во кој Претседателот на Собранието на вулгарен начин се однесуваше кон вработените и демонстрираше вербална сила е слика и прилика на целиот јавен сектор. Примерот којшто вчера го видовме само ги охрабрува истите тие раководители уште посилно да вршат мобинг, тортура и притисок врз вработените во јавниот сектор“, реагира синдикатот.

КСС бара јавно извинување од Претседателот на Собранието Талат Џафери кон истите тие работници коишто беа навредувани и вербално малтретирани од него и ги повикува институциите на системот да ги преземат сите мерки за санкционирање на ваквото нечовeчко однесување од страна на Претседателот на Собранието.

„Конфедерацијата на слободни синдикати на Македонија има морална и етичка обврска да реагира на крајно вулгарниот однос на Претседателот на Собранието на Република Македонија, Талат Џафери. Вчерашниот настан којшто е пренесен преку социјалните мрежи е со крајно понижувачки и потценувачки однос кон вработените во Собранието и јасно ја искажува сликата и начинот на однесување на избраните и именувани лица коишто раководат со јавниот сектор во државата“, се вели во соопштението.

Синдикатот вели дека вработените во јавниот сектор работат под огромен пристисок од избраните и именуваните лица, што им создава стрес на работното место, а од друга страна заработуваат минимални плати со кои не можат да ги сервисираат своите животни трошоци.