Истражувачкиот новинар од Словачка, Јан Кучијак и неговата девојка се убиени во неделата, соопшти полицијата денеска, поврзувајќи го убиството со неговите новинарски текстови.
Безживотните тела на 27-годишниот Кучијак и неговата девојка полицијата ги пронашла во нивниот дом во Велка Маца, источно од Братислава.
Шефот на словачката полиција, Тибор Гаспар, изјавил дека „убиството веројатно е поврзано со неговите истражувачки активности“.
По неговото убиство, премиерот на државата, Роберт Фико, изјавил дека доколку се докаже дека станува збор за убиство, тоа претставува сериозен напад врз слободата на медиумите и демократијата во Словачка.
Словачкиот претседател Андреј Киска побара брза истрага за убиството на истражувачкиот новинар, соопшти Ројтерс.
„Мораме да ги пронајдиме сторителите колку што е можно побрзо за да осигураме безбедност на новинарите“, изјавил Киска.
Новинарот бил застрелан во градите, а неговата девојка во главата, а според проценките на полицијата, биле убиени помеѓу четвртокот и неделата.
Кучијак работеше за Aktuality.sk со фокус на затајување на данок.
„Шокирани сме од веста дека Јан Кучијак и неговата партнерка се жртви на сурово убиство“, изјавил Ринги Аксел Спрингер, сопственикот на овој веб-сајт, искажувајќи сочувство на фамилијата на новинарот.
Како што пишува Ројтерс, во последниот новинарски текст, Кучијак пишувал за бизнисмен кој бил осомничен дека продавал станови во комплекс апартмани кои биле во негова сопственост. Тој ја поставил тезата во текстот, од кои причини бизнисменот го правел ова, односно дека станува збор за затајување на данок.
Минатата година словачкиот новинар поднел пријава до полицијата по закана од бизнисменот Мариан Кочнер, кога пишувал за него, но полицијата не делувала.