Земјиштето спроти хотелот Холидеј ин е купено по багателна цена која е двојно пониска од пазарната.
Фирмите Обновители- која припаѓа на МПЦ и на Зоран Антиќ, заедно со фирмата на Зоран Антиќ и неговата сопруга Тања- М.Г Фешн платиле по 300 евра за квадрат за земјиштето.
Но, според документ до кој дојде НОВА, ова земјиште претходно е проценето дека вреди 640 евра по метар квадратен. Вредноста од 640 евра ја утврдил проценител за имотот на МПЦ кој е на истата градежна парцела и тоа уште уште во 2010 година.
Од тогаш до денес логично е да се очекува цената на земјиштето да расте, посебно по одлуката на Општина Центар на ова парцела да се градат згради, кои се профитабилен бизнис. Но, наместо тоа цената двојно се намалува и земјиштето се продава поевтино.
Продажбата на земјиштето по ниска цена, во Министерството за транспорт го правдаат со Уредба која ја усвоила претходната Влада за цени по кои ќе се продава градежно државно земјиште.
Во овој ценовник што е донесен на владина седница на 30 август 2016 година, во времето на техничкиот премиер Емил Димитриев, највисока цена за дооформување на градежна парцела е 19.200 денари – и по оваа цена е купено земјиште од 9.048 м2 спроти хотелот Холидеј ин.
Сопствениците Обновители и М.Г Фешн за оваа парцела платиле 2,8 милиони евра – од нив дури 2,3 милиони евра платила фирмата Обновители, на МПЦ и на бизнисменот Зоран Антиќ. Тие добиле 7.401 м2 од оваа локација, а се сопственици на уште 3.763 – имот на МПЦ добиен со денационализија.
Фирмата М.Г Фешн за 1.647 м2, колку што добила од вкупната парцела, уплатила 500. 000 евра.
Во Министерството за транспорт велат дека тие немаат законска обврска да побараат да се утврди потеклото на парите и упатуваат на други институции кои се надлежни за тоа.
Овие две фирми сега поседуваат вкупно 13. 640м2 во центарот на Скопје – градежната парцела која ја откупиле 100 проценти, зафаќа поголем дел од паркинг просторот спроти хотелот Холидеј ин до булеварот Кочо Рацин и Вардар.
Во апликацијата за дооформување на градежната парцела која ја поднеле до Министерството за транспорт навеле дека на ова место планираат да градат згради за колективно домување и деловни објекти.
НОВА вчера објави колкав дел од имотот во станови и деловни објекти ќе добие МПЦ. Според Договорот што го склучиле застапникот на г.г Стефан и Антиќ, парите за доокупување на парцелата треба да ги уплати Антиќ , а по изградба на зградата на денационализраниот имот, МПЦ ќе добие половина од становите и деловните објекти што се на овој имот.
Ваквите бизнис врски на Црквата се неразбирливи и несфатливи за јавноста, особено што никој не очекува МПЦ да биде инволивирана во зделки во кои се делат станови и профити.
Од Министерството за транспорт не најавуваат промени во ценовникот за откуп на градежно државно земјиште, со што се остава отворена вратата за нови вакви зделки.
Во центарот на Скопје, во близина на градежната парцела спроти Холидеј ин и ГТЦ има преостанато уште земјиште кое е државно или расцепкано по сопственици.
МПЦ се уште не одговори и на другите сомнителни случаи кои НОВА ги објави а се поврзани со финансирањето на црквата „Свети Константин и Елена“ и на кој начин биле собирани пари преку фондацијата „Свети Цар Константин“ за изградба на црквата.