Published: Friday, February 28, 2020 08:27
Во Кривичниот суд за денеска е закажано продолжение на судењето за случајот „Рекет“. Вчерашното рочиште беше одложено поради отсуство на поранешниот градоначалник на Општина Центар и бизнисмен Владимир Тодоровиќ кој треба да сведочи по предлог на одбраната на првообвинетиот Бојан Јовановски-Боки 13.
Тодоровиќ е еден од 12-те предложени сведоци од обвинетиот Бојан Јовановски. Како сведок треба да се појави и Лидија Јаневска која за вчерашното рочиште немала уредна достава на покана.
Судијката Васка Николовска-Масевска информира дека Судот го одбива барањето на обвинетиот Бојан Јовановски за укинување на мерката притвор.
Основното јавно обвинителство за гонење организиран криминал и корупција во октомври лани поднесе обвинение против Бојан Јовановски, Катица Јанева и Зоран Милевски.
Првообвинетиот Јовановски се сомничи дека сторил кривично дело „перење пари и други приноси од казниво дело“ и за „примање награда за противзаконито влијание“. Второобвинетата Јанева се товари дека сторила кривично дело „злоупотреба на службена положба и овластување“.
На првото рочиште за „Рекет“, што се одржа на 3-ти декември минатата година, третообвинетиот Зоран Милевски-Кичеец призна вина за делото „примање награда за противзаконито влијание“, по што беше осуден на три години затвор.