Седум месеци по трагедијата во тетовската модуларна болница се уште е неизвесно дали ќе има кривична одговорност за 14 животи кои згаснаа во катастрофалниот пожар на 8 септември лани.

Тетовското обвинителство неодамна информираше дека надлежните обвинители секојдевно работат на случајот и дека детално го анализираат извештајот од германските експерти во кој на седум страници се содржани битни елементи за несреќата, но не прецизираа кога ќе излезат во јавноста со конечен извештај како се случила несреќата и дали некој и кривично ќе одговара.

Нова Тв побара одговори од Основното Јавно обвинителство од каде што велат дека предметот за пожарот во модуларната болница во Тетово се уште е во предистрага поради што и не можат да споделат детали од истрагата со јавноста.

– Во овој момент се вршат анализи на прибраните докази, предистрагата се уште трае и ќе трае се додека не завршат анализите на сите докази, нема ограничувања со законски рокови кога станува збор за предистрага – објаснуваат од Обвинителството.

Според истрагата на крим-техничарите на МВР, пожарот во модуларната болница во Тетово настанал како последица од електрична куса врска преку висок преоден отпор во приклучниот кабел на дефибрилатор со кој се вршела реанимација на пациент во една од болничките соби.

Прегревањето на кабелот предизвикало палење во приклучната кутија од продолжителниот кабел на кој бил приклучен дефибрилаторот, полнач за мобилен телефон и уште еден апарат. Вештачење вршеше и Технолошкиот факултет, кое треба да одговори на прашањето зошто модуларната болница, изгоре за само неколку минути.

Првичните информации дека продолжен кабел кој се прегреал го поттикнал пожарот кој за кратко време ја зафати болницата се очекува да добијат потврда во истрагата.

Активистите од движењето „Подобро за Тетово“ уште пред четири месеци побараа брзо расчистување на случајот и одговорност на сите инволвирани.

„Тетово и јавноста сакаат да знаат до каде е истрагата? Зошто Обвинителството објави дел од вештачењето на крим-техника без да го покаже извештајот на германските експерти? Досега немаме конкретен одговор дали болницата имала или не систем за противпожарна заштита“, реагираа активистите.

Според невладината организација, тоа што меѓу жртвите има и членови на семејствата кои биле принудени да се грижат за своите роднини, е уште едно кривично дело за кое обвинителството мора да бара кривична одговорност од управата на болницата.

– Истрагите треба да се спроведуваат без да се штити некој, на која и да е државна или партиска позиција, побараа тетовските активисти.

С.М.