Со нова обврска кон СЈО заврши и второто подготвително рочиште за случајот Тврдина 2 во која обвинетиот началник на петтата управа на УБК Горан Грујовски и неговите шест колешки се товарат за уништување на службена документација поврзана со опремата за прислушување.
Судијката Лидија Петровска, овој пат побара од СЈО да се обрати до Дирекцијата за заштита на класифицирани податоци и до МВР за дообјаснување околу барањето на ова обвинителство за судска употреба на доказите кои се сметаат за класифицирани информации во случајот.
СЈО пак, тврди дека не бара доказите кои сака да ги употреби во случајот да бидат декласифицирани, туку да може да ги видат и слушнат лица кои имаат обезбедено безбедносен сертификат.
Од одбраната во текот на рочиштето тврдеа дека требало СЈО доказите да ги набави пред почнувањето на судскиот процес, додека обвинителите од СЈО рекоа дека до следното подготвително рочиште повторно ќе се обидат и ќе направат се што е во нивна моќ за да ги добијат доказите кои ги бараат.
На подготвителното рочиште беше утврдено дека една од адвокатите на обвинетите Јована Тасевска нема безбедносен сертификат, што значи дека доколку не го набави истиот, нема да може да изврши увид во доказите кои се сметаат за класифицирани.
Следно подготвително рочиште е закажано за 13 март.
Претходно новинарите беа отстранети од рочиштето за да може да се прочита дописот кој СЈО го добило од МВР.