Основното јавно обвинителство Прилеп донесе наредба за спроведување истражна постапка против едно лице, за кое постои основано сомнение дека сторил кривично дело – Неовластено производство и пуштање во промет на дрога и спречување на службено лице во вршење службено дејствие.
На 31 мај, осомничениот 24-годишник од Охрид, опишува Обвинителството, на магистралниот пат Прилеп-Градско пренесувал 86,11 килограми наркотична дрога марихуана, наменета за натамошна продажба. Дрогата ја сместил во четири патни торби, на задното седиште од автомобилот, па во близина на бензинска пумпа на излезот од Прилеп бил сопрен од полициски службеници. Кога се обиделе да извршат контрола, со употреба на сила, тој ги спречил службените лица. На даден знак, тој најпрвин го запрел возилото, а кога полициските службеници се доближиле да го проверат неговиот идентитет и сообраќајните документи, нагло со големо забрзување побегнал возејќи во правец кон полицајците. За да го избегнат ударот, тие скокнале на страна, а осомничениот со автомобилот удрил во службеното полициско возило и во уште еден автомобил во близина. Потоа продолжил да вози кон Градско и кога пристигнал кај местото викано „Ленишки мост“, запрел и започнал од автомобилот да ги исфрла торбите со дрога. Полициските службеници го забележале, го совладале и го лишиле од слобода.
Надлежниот јавен обвинител до судијата од Основниот суд во Прилеп достави предлог за притвор, оценувајќи дека постои опасност осомничениот да побегне и да се обиде да ги прикрие трагите од извршеното дело. Судијата го прифати барањето и на осомничениот му даде притвор 30 дена.