Сметката на Клиниката за гинекологија и акушерство ќе биде одблокирана со средства што Фондот за здравствено осигурување ги обезбедил за клиниката како аванс, изјави денеска министерот за здравство Венко Филипче.
Ова е договорено на денешниот состанок со директорот на Фондот за здравствено осигурување на Македонија. Авансот е онолку колку што е сумата за блокираната сметка, но, како што посочи, не станува збор за средства кои се скратени од некаде туку, за дополнителна сума пари.
– Ќе се обезбеди дополнитена сума пари во форма на аванс. Таа сума ќе биде достапна за Клиниката за гинекологија во текот на денешниот ден или евентуално заради близината на празниците во текот на наредната недела во вторник. Проблемот е решен и сметката ќе биде ослободена за нормално функционирање на клиниката, рече Филипче пред денешната конференција за за унапредување на услугите во социјалната дејност и јавното здравство.
Тој не очекува наскоро да дојде до ново блокирање на сметката на Клиниката, иако има уште постапки кои се водат за истата проблематика заради која сметката на Гинекологија беше блокирана.
Вели дека работата и нормалното функционирање на клиниката не се загрозени, ниту платите на вработените.
Како што вчера објави НОВА, сметката на Клиниката за гинекологија е блокирана за 410 000 евра кои установата морала да ги исплати по основ на тужбени барања од семејства кои во 2008 година ја тужеле клиниката. Станува збор за тужби поради дијагноза, ретинопатија која не била навреме откриена кај нивните бебиња поради што децата останале со трајно слепило. Овие тужби се од периодот кога на Гинекологија немаше протокол според кој очни лекари треба да доаѓаат и да ги прегледуваат предвреме родените бебиња. Многу деца настрадаа во период од тие неколку години.